ಪ್ರೀತಿಸಬಲ್ಲೆಯಾದರೆ ಹೇಳು

ನೀನು ಒಮ್ಮೆಯಾದರೂ ನನ್ನನ್ನು
ಪ್ರೀತಿಸಬಲ್ಲೆಯಾದರೆ ಹೇಳು
ಮೌನಕ್ಕಿದು ಸಕಾಲವಲ್ಲ
ಸದ್ದೇಮಾಡದ ಒಲವಿಗೆ
ಕಿವಿಯಾಗುವುದು ಹೇಗೆ ಹೇಳು

ಯಾವಾಗ ಬರೆದಿಟ್ಟೆ ಈ ಸಾಲುಗಳನ್ನು
ನೆನಪಿಗೇ ಬರುತ್ತಿಲ್ಲ ನೋಡು
ಅದಲುಬದಲಾಗಿಸಬಹುದೇ ಹೊಸತು-ಹಳತುಗಳನ್ನು!
ಮೌನವನ್ನೇ ಆಲಿಸುತ್ತೇನೆ ಬಿಡು
ಈಗಲಾದರೂ ಹೇಳು
ಪ್ರೀತಿಸಬಲ್ಲೆಯಾ ಒಮ್ಮೆಯಾದರೂ?

ಮನದ ಮಾತುಗಳು
ಮುಗಿದುಹೋಗುವ ರೀತಿಗೂ
ಒಂದು ಚೆಂದದ ಲಯವಿದೆ
ಗೊತ್ತಿಲ್ಲ ನಿನಗೆ
ಆರ್ತನಾದಕ್ಕೆ ಕೇಳುಗರು ಬೇಕಿಲ್ಲ
ಒಂದು ನಗುವಿಗಾಗಿ ಪರಿತಪಿಸಿದ
ಒಂದೇ ಒಂದು ಕನಸಿಗಾಗಿ ಕೈಯೊಡ್ಡಿದ
ಸದ್ದುಮಾಡದ ಆಕ್ರಂದನವೂ
ಮುಗಿದುಹೋಗುವ ಮುನ್ನ
ಒಮ್ಮೆ ಪ್ರೀತಿಸಬಲ್ಲೆಯಾ ಹೇಳು

ಸವಕಲೆನ್ನಲೇ ನಿನ್ನ!
ಬಲಗೆನ್ನೆಯ ಅಂಚಲ್ಲೊಂದು ಸುಟ್ಟಕಲೆಯಿತ್ತು
ಅದು ನಿನ್ನ ಕೆನ್ನೆಯೋ, ನನ್ನದೋ
ಅಸ್ಪಷ್ಟ ನೆನಪುಗಳು
ಬಹುಕಾಲ ಬಾಳುತ್ತವೆ
ನೀನು ಆತುನಿಂತ
ಆ ಬಣ್ಣಮಾಸಿದ ಮೋಟುಗೋಡೆಯುದ್ದಕ್ಕೂ
ಚಾಚಿಕೊಂಡ ನಿನ್ನ ಕೈಬೆರಳುಗಳು
ನನ್ನೊಳಗೂ ಹರಡಿಕೊಳ್ಳಲಿ
ಆಸೆಗಳೆಲ್ಲ ಮಾಸಲಾಗುವ ಮುನ್ನ
ಒಮ್ಮೆಯಾದರೂ ಪ್ರೀತಿಸಬಲ್ಲೆಯಾ ಹೇಳು
           ******