ಕಂಬಳಿಹುಳು

(ಮೇಲೆ ನೀಡಲಾದ ರೇಡಿಯೋ ಬಟನ್‌ ಕ್ಲಿಕ್ ಮಾಡುವ ಮೂಲಕ ಕವಯತ್ರಿ ಅಂಜನಾ ಹೆಗಡೆಯವರ ಧ್ವನಿಯಲ್ಲಿಯೇ ಕವಿತೆ ಆಸ್ವಾದಿಸಿ)

ಸೀರೆಯಂಚಿನ ಕುಚ್ಚಿನಂತೆ
ಗಾರ್ಡನ್ನು ಕಿಚನ್ನು ಸೋಫಾ ಕಪಾಟು
ಎಲ್ಲೆಂದರಲ್ಲಿ
ಸೊಂಟ ಬಳುಕಿಸುತ್ತದೆ
ಒಮ್ಮೆ ನೆಲದ ಮೈಸವರುತ್ತ
ಮತ್ತೊಮ್ಮೆ ಮಡಿಕೆಯೊಳಗೆ ಅಡಗುತ್ತ
ಆಗಾಗ ನಾಚುತ್ತ ನಸುನಗುತ್ತ
ಮೆತ್ತಗೆ ಅತ್ತಿಂದಿತ್ತ ಕದಲುತ್ತದೆ
ಹೊಳೆವ ಬಣ್ಣಗಳಲ್ಲೊಂದು
ಉರಿವ ಹೃದಯ

ಥಟ್ಟನೆ
ಕರಿಮೀಸೆಯಾಗಿಬಿಡುವ ಕಂಬಳಿಹುಳು
ತುಟಿಯಂಚಿನ ಮಾತ ಮುಚ್ಚಿಟ್ಟು
ಇದ್ದೂ ಇಲ್ಲದಂತಾಗಿಬಿಡುತ್ತದೆ
ಸಮಯ ಸಿಕ್ಕಾಗಲೊಮ್ಮೆ ನೇವರಿಸಿ
ಅತ್ತಿತ್ತ ಸರಿಸಿದರೆ ಎಲ್ಲ ಸರಾಗ
ದಿಕ್ಕುತಪ್ಪದ ಚಲನೆ!
ಕಲಿಸಬೇಕಿಲ್ಲ
ಜಾಡು ಮುಚ್ಚಿಡುವ ಜಾಣ್ಮೆಯ
ಬೆರಳಿಗೆ ತಾಕಿದ ಉರಿ
ಹೃದಯಕ್ಕಿಳಿಯುವುದಿಲ್ಲ

ಹಕ್ಕಿಯಂತೆ ಮನಬಿಚ್ಚಿ ಹಾಡುವುದಿಲ್ಲ
ಕಂಬಳಿಹುಳು!
ಮೀನಿನಂತೆ ಮನಬಂದಂತೆ
ಈಜುವುದೂ ಇಲ್ಲ
ರೆಕ್ಕೆಮೂಡುವವರೆಗೂ ಪಟ್ಟುಹಿಡಿದು ಕಾಯುತ್ತ
ಗುಟ್ಟಾಗಿ ಹಾರಿ ಮಾಯವಾಗುತ್ತದೆ
ಎತ್ತ ಹಾರಿತೆಂದು
ದೃಷ್ಟಿಹಾಯಿಸುವ ಮುನ್ನವೇ
ಬೆಳಕಿನ ಮಾಯೆಯಲ್ಲಿ
ಮುಳುಗೇಳಿಸುತ್ತದೆ
ಬಯಕೆಯ ಬಣ್ಣಗಳೆಲ್ಲ ಮತ್ತೆ
ಕಂಬಳಿಹುಳುವಾಗಿ
ನಡುಕ ಹುಟ್ಟಿಸುತ್ತವೆ