ಕುಳಿರು ಕಾಲ

ಚಳಿಯ ಕಾಲ ಬಂದಿದೆ

ಒಳಗೆ ಬಯಕೆ ತುಂಬಿದೆ

ಬಳಿಗೆ  ನೀನು ಬರದೆ ವಿರಹ ಕಾಡಿದೆ|

ತಳೆದ ಗಾಢ ಮೋಹ

ಕುಲುಮೆಯಲ್ಲಿ ತನು_ಮನ 

ಬಳಲಿ ನೋವಿನಿಂದ ತಾನು ಬೆಂದಿದೆ||

ಬರದೆ ಓ ಸಖ ನೀನು

ಮರುಳು ವಿರಹಿಣಿ ನಾನು

ಅರಿಯದುಳಿದೆ ಏಕೆ ದೂರದಿ ಇನ್ನೂ|

ಸುರಿಸಿ ಪ್ರೇಮ ಧಾರೆಯ

ಸುರತಕೊದಗಿ ಬಾರೆಯ

ಎರೆಯನೆ ಕೇಳು ಶೀತ ಸುಡುತಲಿಹುದು||

ತನುವ ಸೀಳಿ ಬರುತಿದೆ

ಮನುಮಥನ ಸುಮಶರವು

ಅನುಕರಿಸಿ ಮೋದದಿ ಕುಳಿರು ಪವನನು|

ಅನುಕೂಲ ನೀನಿರಲು

ಮನದಿನಿಯ ಬಾ ಬೇಗ

ಅನುಪಮ ಸೊಗದಲಿ ಮೀಯುವ ತೋಷದಿ||