ಮಾರಾಟವಾಗದ ನೆಲ

ಮಾರಾಟವಾಗದ ನೆಲವೆಂದರೆ
ಸಕಾಲಕ್ಕೆ ಮದುವೆಯಾಗದ ಹೆಣ್ಣು
ಎಲ್ಲಿ ಕಂಡರೂ ಜನರು
ಏನೇನೋ ಮಾತಾಡಿ ಕೊನೆಗೆ
“ಮಗಳಿಗೆ ನೆಂಟಸ್ತಿಕೆ ಬಂತೇ “
ಎನ್ನುವಂತೆ
“ಜಾಗಕ್ಕೆ ಗಿರಾಕಿಗಳು ಬಂದ್ರೇ?”

ಮಾಲೀಕನ ಅನುಪಸ್ಥಿತಿಯಲ್ಲಿ
ಜಾಗ ನೋಡಲು ಬಂದವರ
ಸಾಗ ಹಾಕುವವರಿದ್ದಾರೆ
ಮುಗ್ಧ ಜಮೀನಿನ ಮಾನವನ್ನು
ಮನ ಬಂದಂತೆ ಹರಾಜು ಮಾಡುವವರಿದ್ದಾರೆ

ತಕ್ಷಣ ಪ್ರತಿಕ್ರಯಿಸಲಸಾಧ್ಯವಾದಾಗ
ಬಾಯಿಗೆ ಬಂದಂತೆ ಬಡಬಡಿಸುವ
ತಲೆಕೆಟ್ಟ ಬ್ರೋಕರ್ ಗಳು

ಮಾರಾಟವಾಗದ ನೆಲವೆಂದರೆ
ಸುಮ್ಮನೆ ಅಲ್ಲ.
ಉಪಯೋಗಕ್ಕಿಲ್ಲದೆ
ಮೂಲೆಯಲ್ಲಿ ಬಿದ್ದ ನೋವೆಂದರೆ
ಸಾಮಾನ್ಯವಲ್ಲ.
ಸದಾ ಕಾಯುತ್ತಿರುತ್ತದೆ
ತನ್ನನ್ನು ಕೊಳ್ಳುವವನಿಗಾಗಿ.

ಗುಡಿಸಲೋ ಅರಮನೆಯೋ
ಏನಾದರೊಂದು ಕಟ್ಟಿ ಬಿಡಿ
ಎಂದೆನ್ನುವ ಅದರ ಅಳಲು.
ಕುಡುಕನಿಗೋ ಸಿಡುಕನಿಗೋ
ಯಾರೊಂದಿಗಾದರೂ ಸರಿ
ಕಟ್ಟಿಸಿ ಬಿಡಿ ಎಂದಳುವ
ಅವಿವಾಹಿತ ಹೆಣ್ಣಂತೆ

ಯಾರೂ ಇಲ್ಲದ ಸಮಯದಲ್ಲಿ
ತನಗಿಷ್ಟ ಬಂದಂತೆ ಚಿಗುರೊಡೆಯುವ
ಕಳೆ ಗಿಡಗಳ ಬಗ್ಗೆ ದ್ವೇಷ

ಯಾರು ಯಾರೋ ಬಂದು
ಹೂ ಹಣ್ಣುಗಳ ಕದ್ದೊಯ್ಯುವ ಬಗ್ಗೆ
ಭಯ

ಪಾಳು ಬಿದ್ದ ಮನೆ
ಪೋಲಿಗಳ ಕೇಂದ್ರವಾಗುವ ಆತಂಕ.
ಸೇರಿಕೊಂಡಿರುವ ವಿಷಜಂತುಗಳ
ನೆನೆವಾಗ ತತ್ತರ

ಬಿಕ್ಕಿ ಬಿಕ್ಕಿ ಅತ್ತರೂ
ವಾರೀಸುದಾರ ಅಸಹಾಯಕ.
ದಿನವೆಷ್ಟೇ ಕಳೆದರೂ ಕಾಯುತ್ತಾನೆ
ಸಿಗಬೇಕಲ್ಲ ಸರಿಯಾದ ರೊಕ್ಕ

******