ಮತ್ತೆ ಬರಲೇ ಬೇಡ ಬಾಪು

ಭಾರತಕ್ಕೆ ಸ್ವಾತಂತ್ರ ತಂದುಕೊಟ್ಟ ದಾತ
ನಿನ್ನನ್ನು “ತಾತ” ಎಂದು ಕರೆದದ್ದು
ಆತ್ಮೀಯತೆಗೋ? ಇಲ್ಲ ಸಲುಗೆ ಇರಲೆಂದೋ?
ನಿನ್ನ ಸರಳ ಜೀವನದ ಅಣಕು
ಸಿನೇಮಾ  ಥಿಯೇಟರುಗಳ ”ಗಾಂಧಿ” ಕ್ಲಾಸಿನಲ್ಲಿ
ಸತ್ಯ ಸಂಧತೆಯ ನಿನ್ನ ಹೆಸರಿನ ಟೋಪಿಯಡಿ
ಮೋಸ ವಂಚನೆಯ ತಂತ್ರ;
ಬ್ರಿಟಿಷ್ ಶಾಹಿಯನು ನಡುಗಿಸಿದ ನಿನ್ನ
‘ಸತ್ಯಾಗ್ರಹ ‘ಮಾತು ಮಾತಿನ ಅಣಕ
ಪಟ್ಟ ಪದವಿಯ ತೊರೆದ ನಿನ್ನ ಹೆಸರಿನಲಿ
ಕುರ್ಚಿಗಾಗಿ ಕಚ್ಚಾಟ ; ಸ್ವಾರ್ಥ ತುಂಬಿದ ಕೂಟ;
ಸ್ವಾತಂತ್ರದ ಸಿಹಿಯುಣ್ಣಿಸಿದ ನಿನಗೆ
ಸಿಕ್ಕದ್ದು ಸಿಡಿ ಗುಂಡಿನ ರುಚಿ;
“ಇನ್ನಿನಿಸು ನೀ ಬದುಕಬೇಕಿತ್ತು, ಮತ್ತೊಮ್ಮೆ ನೀ ಬರಬಾರದೆ?”
ಇತ್ಯಾದಿ ಕವಿವಾಣಿಗಳಿಗೆ ಬೆರಗಾಗಿ
ಮರುಳಾಗಿ ಬಂದು
ಸ್ವಾರ್ಥ ವಂಚನೆ ವಿಷವರ್ತುಲಗಳಲಿ ಸಿಲುಕಿ
ನೀನೂ ಬದಲಾಗಿ ಬಿಡುತ್ತೀಯೋ?
ಸೀಟಿಗಾಗಿ, ಓಟಿಗಾಗಿ ಬೇಟೆಯಾಡಿ ಅಲೆದಾಡುವೆಯೋ
ಇಲ್ಲಾ ನೀ ಕಟ್ಟಿದ ಸುಂದರ ಭಾರತದ
ಇಂದಿನೀ ಸ್ಥಿತಿಗೆ ಹೆದರಿ ಹೃದಯ ಒಡೆದು ಸಾಯುವೆಯೋ?
ಅದೇ ಹೆದರಿಕೆ ನನ್ನಿಂದ ನುಡಿಸುತಿದೆ ಓ ಶಾಂತಿದೂತ
ಮತ್ತೆ ಬರಲೇ ಬೇಡ ಬರಲೇ ಬೇಡ ಬರಲೇ ಬೇಡ ಬಾಪು!!!!!

             *ಡಾ ಸತ್ಯವತಿ ಮೂರ್ತಿ