ಗುಬ್ಬಿ ಕಥೆ

(ಮಕ್ಕಳ ಪದ್ಯ)

ಒಂದು ಗುಬ್ಬಿ 

ಅದರ ಕೀರ್ತಿ 

ದಿಗ್ದೇಶಗಳಿಗೆ ಹಾರಿ ಹಾರಿ 
ಹಬ್ಬಿ...  

ಅದರಿಂದ ಗುಬ್ಬಿ
 
ಸಿಕ್ಕಾಪಟ್ಟೆ ಉಬ್ಬಿ 

ಏನೇನೋ ಆಟಗಳ ಆಡಿ 
ಕಣ್ಣುಕಟ್ಟು ಮಾಡಿ 


ಆಗಿಬಿಟ್ಟಿತು  ಪಾರಿವಾಳ 
ನಕ್ಕುಬಿಟ್ಟಿತು  ದಾಸವಾಳ 

ಎಲಾ, ನೀ ನಕ್ಕೆಯೇಕೆ ದಾಸವಾಳ?
ಕೇಳಿತು ಹೊಸ ಪಾರಿವಾಳ 

ಹೇಳಿತು ಹೂವು 
ನಮ್ಮಂತೆ ಇರಬೇಕು ನಾವು! 

ಪಾರಿವಾಳವಾಯಿತು 'ಒಂದು ಗುಬ್ಬಿ' 
ಬರೀ ನಾಕು ದಿನ ಬ್ರೇಕಿಂಗ್  ಸುದ್ದಿ! 

ಗುಬ್ಬಿಯೇ ಆಗಿದ್ದು ನೀನು 
ಏನೆಲ್ಲ ಮಾಡಿದೆ 
ಎಷ್ಟೂರು ತಿರುಗಿದೆ 
ಗುಬ್ಬಿಗಳ ಕಾಪಾಡಿ 
ಕಾಪಾಡಿ ಎಂದೆ 
ಹೊಸ ಅರಿವು ತಂದೆ 
ಹೆಸರು ಗಳಿಸಿದೆ, ಅಲ್ಲವೇನು?
ನಿನ್ನ ಸಾಧನೆಯ ಮರೆಯಬಹುದೇನು?

ನಾನಿನ್ನು ಇರೋದು  ಕೆಲ ಹೊತ್ತು ಮಾತ್ರ 
ಹೇಳುವೆನು ಮಿತ್ರ  
ಮತ್ತೆ ನೀ ಗುಬ್ಬಿ ಮರಿಯಾಗು
ಪಾರಿವಾಳದ ವೇಷ ಬರಿ ಸಂತೆ ಸೋಗು 
ವೇಷ ಬದಲಿಸಿ ನೀನು ಗುಬ್ಬಿಯೇ ಆಗು 
                                           **

ಒಪ್ಪಿಕೊಂಡಿತು ಹಕ್ಕಿ 
ಗುಬ್ಬಿಮರಿಯಾಯ್ತು!
ನಮ್ಮ ಕಥೆ ಮುಗಿಯಿತು 
ಎಲ್ಲ ಸರಿ ಹೋಯ್ತು!
^^^