ನಾದಾ@70

ಶುಭಾಶಯಗಳು ಗೆಳೆಯ ನಾದಾಗೆ
ಎಪ್ಪತ್ತು ತುಂಬಿದ ಕುಡ್ಲದ ದಾದಾಗೆ
ಎಪ್ಪತ್ತು ತುಂಬಿದರೂ ಇಪ್ಪತ್ತರ ನಗೆ
ಜೀವನೋತ್ಸಾಹ ಉಕ್ಕುವ ಪರಿಗೆ

ಅಭಿನಂದನೆ, ಗಡಿನಾಡ ಮಲಯಾಳಿಗೆ
ಆ ಭಾಷೆಯ ನಾದ ಈ ಭಾಷೆಗೆ ತಂದ
ಕನ್ನಡಮ್ಮನ ಪ್ರೀತಿಯ ಮನೆಯಾಳಿಗೆ
ಮಾಡಿರುವ ಸಾಧನೆಯ ಸರಮಾಲೆಗೆ

ವಿದ್ಯಾರ್ಥಿಗಳ ಅಚ್ಚುಮೆಚ್ಚಿನ ಪ್ರಾಧ್ಯಾಪಕ
ರಂಗಭೂಮಿಯ ನುರಿತ ನಟ, ನಿರ್ದೇಶಕ
ಕಿರುತೆರೆ, ಹಿರಿತೆರೆಗಳಲ್ಲೂ ಹಾಕಿ ಹಾಜರಿ
ತೋರಿದಿರಿ ಪ್ರತಿಭೆಯ ವಿವಿಧ ಮಾದರಿ

ಅನುವಾದಗಳ ಜತೆ ಬರೆದಿದ್ದೀರಿ ಕತೆ
ಕಾದಂಬರಿ, ನಾಟಕ, ಅಂಕಣ, ಕವಿತೆ
ಭೂಮಿಕಾ, ದಾಸಜನ, ಹತ್ತಾರು ಸಮಿತಿ
ಕೇಳಲಿಲ್ಲ ಸಾಕೆಂದರೂ ಸತಿ ಸುಮತಿ

ಮಾಡುತ್ತಲೇ ಇದ್ದಿರಿ ಕರೆಗಳ ಮೇಲೆ ಕರೆ
ಗೆಳೆಯರಿಗೆ, ಎಳೆಯರಿಗೆ ನೆರವಾಗಲು
ಕರೆದ ಕಡೆಗೆಲ್ಲ ಹೋದಿರಿ ನಿಮ್ಮದೆ ಕಾರಲ್ಲಿ
ಲೆಕ್ಕ ಹಾಕದೆ ಕಿಲೊಮೀಟರು, ಪೆಟ್ರೋಲು

ನಾ ಎನ್ನದ ನಾ ದಾಮೋದರ ಮಿತ್ರರಿಗೆ ಸದಾ
ತೆರೆದ ಬಾಗಿಲು, ಸರಳ, ಸೀದಾ ಸಾದಾ
ಎಲ್ಲರಿಗೂ ಹಂಚುತ್ತ ಸ್ನೇಹದಾಮೋದ
ನೂರ್ಕಾಲ ಹೀಗೆಯೇ ಇರಲಿ ಈ ನಾದಾ
-ಎಚ್. ಡುಂಡಿರಾಜ್

* ಎಪ್ಪತ್ತರ ಸಂಭ್ರಮದಲ್ಲಿರುವ ಡಾ.ನಾ.ದಾ. ಅವರಿಗೆ ಹುಟ್ಟುಹಬ್ಬದ ಶುಭಾಶಯಗಳು: ‘ವಿಶ್ವಧ್ವನಿ’ ಬಳಗ